Нөкисте «Ҳаяллардың социаллық бейимлесиў мәсләҳәт» орайы ашылды.
Президентимиздиң 2018-жыл 2-июльдеги «Социаллық реабилитациялаў ҳәм бейимлестириў, сондай-ақ, шаңарақлық-турмыслық зорлық ислетиўдиң алдын алыў системасын жетилистириў илажлары ҳаққында»ғы қарарының орынланыўын тәмийинлеў мақсетинде Қарақалпақстан Республикасы Ҳаял-қызлар комитети ҳәм оның аймақлық бөлимлериниң жанында «Зорлық ислетиўден жәбир көрген шахсларды реабилитациялаў ҳәм бейимлестириў, өз жанына қастыянлық етиўдиң алдын алыў» орайларын үш басқышта ашыў режеси тастыйықланған.
Усы режеге бола, Қарақалпақстан Республикалық, Әмиўдәря, Хожели, Шоманай, Қоңырат, Шымбай ҳәм Тахтакөпир районлық «Ҳаяллардың социаллық бейимлесиў мәсләҳәт» орайлары ашылып, жумыс алып бармақта. Бундай орайлар 2019-жылдың 1-шерегинде басқа районларда да ашылыўы режелестирилген.
Жақында Нөкис қаласында жумыс баслаған «Ҳаяллардың социаллық бейимлесиў мәсләҳәт» орайының ашылыў мәресимине Өзбекстан Республикасы Бас министриниң орынбасары, Ҳаял-қызлар комитетиниң баслығы Т.Норбоева, Қарақалпақстан Республикасы Министрлер Кеңеси Баслығының орынбасары, Ҳаял-қызлар комитетиниң баслығы З.Ибрагимова қатнасты.
