Илимпазлар ең ақыллы ҳәм ден саўлығы беккем балалар қайсы айда дүньяға келетуғынлығын анықлады. Кембридж алымлары 6 жастан 15 жасқа шекемги 1,2 миллион баланың ойлаў шеңберин үйренген. Изертлеў Флориданың мәмлекетлик мектеплеринде әмелге асырылған. Оның нәтийжесине муўапық, сентябрь айында туўылған балалардың оқыўға үлгериўи жоқары болған. Буннан тысқары, усы айда туўылған балалар ересек жасқа толмағанлар ушын арналған қамақханаға кемирек түскен. Илимпазлар ересек адамлар ортасында да изертлеў жүргизген. Жоқары оқыў орынларында жоқары балл топлағанлардың көпшилиги де усы айда туўылған. Бул мағлыўматлар National Bureau of Economic Research басылымында жәрияланған. Илимпазлар ден саўлығы беккем балалар қайсы айда туўылатуғынлығын анықлаў ушын 1,7 миллион адамның 20 жыл ишиндеги мағлыўматлары менен танысып шыққан. Нәтийжеде, ден саўлығы беккем балалардың көпшилиги май айында туўылатуғынлығын анықлаған. Ал, октябрь айында дүньяға келгенлер шыпакерлерге көп мүрәжат ететуғынлығы белгили болған. Бул илимпазлар тәрепинен анықланған мағлыўматлар. Бирақ, балалардың ден саўлығының беккем болыўы ҳәм оның ақыл-ойының қай дәрежеде болыўы оның ата-анасына ҳәм оны тәрбиялаўшы орталыққа тиккелей байланыслы екенлигин умытпаған мақул.
